د شەش ھەیڤان دا ۳٥۷ رویدان ل دھۆکێ ھاتینە تۆمارکرن

پەیڤدارێ بەڕەڤانیا شارستانی یا دھۆکێ دیارکر، د ماوەیێ شەش ھەیڤێن بۆری دا ٣٥٧ رویدان ھاتینە تۆمارکرن کو ٢٠٤ رویدانێن ئاگری (سۆتنێ) بووینە کو زیانێن مادی ل دویف خۆ ھێلاینە و ١٩ رویدانێن لافاوان بووینە ل سەرانسەری پارێزگەھا دھۆکێ ھاتینە تۆمارکرن و یێن دی ژی جۆر ب جۆر بووینە و ٥ وەلاتیان گیانێ خۆ ژ دەست دایە (ئێک ژوان د ناڤ بەنداڤەکێ دا خندقینە، و چوارێن دی ب ئەگەرێ سۆتنێ گیانێ خۆ ژ دەست دایە و ٤١ وەلاتی ژی ژ لایێ تیمێن بەرەڤانیا شارستانی ڤە ھاتینە قورتالکرن و ھنارتن بۆ نەخۆشخانێ، د رویدانێن وەرگەریانا ترۆمبێلان و د ناڤ ئاڤ و بەنداوان دا.
بێوار عەبدولعەزیز، پەیڤدارێ بەڕەڤانیا شارستانی یا دھۆکێ بۆ رادیویا دھۆک گۆت: تیمێن بەرەڤانیا شارستانی پشکنین بۆ ٣٠٣٥ جەھان (ئاڤاھی و بالەخانە) ل پارێزگەھا دھۆکێ و سنورێ وێ و د دۆربەرا کرینە بۆ پشتراستبوون ژ ھەبوونا مەرجێن خۆپاراستنێ و ئامادەکاریان بۆ کۆنترۆلکرنا ھەر رویدانەکا ئاگری ب رێکا سیستەمێن ئۆتۆماتیکی یان دەستی و کۆما زیانێن مادی یێن ڤان رویدانان پتر بوویە ژ ٢ ملیار و ٥٠٠ ملیۆن دینارێن ئیراقی. زێدەتر گۆت: ئامادەکاری بۆ وەرزێ ھاڤینێ و دروینا گەنم و جەھی ھاتیە کرن چونکو ب ئەگەرێ بارانێن زۆر یێن ئەڤ سالە، بەرھەمێ گەنم و جەھی یێ جوتیاران یێ باشە، ژبۆ پاراستنا ڤان بەرھەمان ژ ئاگری وان ٣٠ تیمێن ئامادەکاریێ دروست کرینە و ھاتینە بەلاڤکرن ل وان جەھێن کو گەنم و جە لێ ھاتیە چاندن، داکو د کێمترین دەم دا بگەنە جێێ رویدانێ و ب ڤێ مەرەمێ ژی بۆ ھەژمارەکا تایبەت د دەمێ ھەر رویدانەکێ دا بۆ جوتیاران تەرخان کریە کو وەلاتی دشێن پەیوەندیێ ب ھژمارا قورتالکرنێ ١١٥ بکەن و ل ھندەک دەڤەرێن سنوری وەک (قەزا شێخان یان ناحیا فەیدێ)، ئەگەر پەیوەندی ب ١١٥ ڤە ھاتەکرن، رەنگە پەیوەندی بچیتە پارێزگەھا مووسل. لەوما وەلاتی دشێن پەیوەندیێ ب ڤێ ھژمارا موبایلێ بکەن: ٠٧٥١٤٨٠٠٣٩١.
ناڤبری گۆت: پێدڤییە جوتیار ھژمارا ڤان تیمان ل دەف خۆ پاشکەفت بکەن بۆ ھەر ھەماھەنگیەکێ و گەشتیار نابیت ل نێزیک جەھێن گەنم و جەھی ئاگرێ سەیرانێ ھەلکەن، نێرگیلێ بکێشن، یان قۆپکێن جگاران بھاڤێژن و جودا ل وان کارێ لەحیمکرنێ (سۆدەکردن) د ناڤ زەویێن گەنم و جەھی دا قەدەغەیە و نابیت چەرخ و چەقماق د دەستێ زارۆکان دا بن ل ڤان جەھان و پێدڤییە ھەر جوتیارەک تانکرەکا ئاڤێ یا ئامادەکری ھەبیت بۆ کۆنترۆلکرنا ئاگری د دەستپێکێ دا، یان بۆ ھاریکاریکردنا تیمێن بەرگیریێ د دەمێ تانکرێن وان خاڵی دبن. لدور رێنمایێن تانکێن غازا LPG رێنماییا ژمارە ۱ یا سالا ۲۰۲۰ ئاشکراکر، ل دویف رێنمایێن وەزارەتا ناڤخۆ، پێدڤییە ئەڤ مەرجە ل سەر تانکێن غازا شل (LPG) بھێنە جێبەجێکرن کو پێدڤییە تانکا غازێ ب دویراتیا ٣ مەتران ل مالان یا دویر بیت ژ وایرێن کارەبێ، جێھێن گەرمێ، و ھەر ئەگەرەکێ ئاگری و د ناڤ ئۆتێل و بالەخانان دا پێدڤییە ب دویراتیا پتر ژ ٧ مەتران بیت داکو زیانێ نەگەھینیتە وەلاتیان و بۆ ڤەگوھاستنا غازێ نابیت ب چ رەنگان تانکێن غازا LPG د روژ و گەرمێ دا د ناڤ سەنتەرێ باژێرێ دھۆکێ دا بھێنە ڤەگوھاستن، و نابیت د ناڤ بازار و پارکینگێن ترۆمبێلان دا بھێنە ڤالاکرن و پێدڤییە کارێ ڤاڵاکرنا غازێ ب شەڤ بھێتەکرن، و ژ لایێ کەسەکێ شارەزا و پسپۆر ڤە بیت کو جلێن دژە ئاگر ل بەر بن (نە ب نەعل یان جلی شۆرت بن) بۆ پاراستنا گیانێ وی. سەبارەت ب رێنمایێن مەلەڤانیێ دیارکر، ب ئەگەرێ لافاو و بارانێن ئەڤ سالە، بنیاتێ بەنداڤ و رویباران ھاتیە گوھرین (بۆری، دار، بەر، یێن کەتینە د ناڤ ئاڤێ دا)، لەوما مەلەڤانی یا ب مەترسی یە و پێدڤییە گەشتیار ل گەل خۆ چۆپێن قورتالکرنێ (حلقە) یان چاکەتێن مەلەڤانیێ بکاربینن و ئەگەر کەسەک بۆ ماوەیەکێ درێژ (٤ تا ٦ ھەیڤان) مەلەڤانی نەکر بێت، نابیت ئێکسەر بچیتە د ناڤ ئاڤێن کوور دا چونکی دێ بیتە ئەگەرێ گرژبوونا ماسولکان (تشنج) چونکو ئاڤێن کوردستانێ یا ساڕ و (فرێشە)، بەرۆڤاژی ئاڤا حەوز و دەریاچێن گەرمە، لەوما وزە و تاقەتەکا زێدەتر دڤێت.
و گۆت: پێدڤییە دایک و باب ئاگەھداری زارۆکێن خۆ بن و نابیت کەسێن مەزن بچنە د ئاڤێ دا و زارۆکان ب تنێ بھێلن، چونکی زارۆک دێ ل دویف چن و تووشی خندقینێ بن و گرنگە ئەگەر تە دیت کەسەک دناڤ ئاڤێ دا د خندقت، و تو یێ شارەزا نەبی د مەلەڤانیێ دا، ب چ رەنگان خۆ نەھاڤێژە د ئاڤێ دا، چونکی تۆ ژی دێ ل گەل وی خندقی (وەک چەندین رویدانێن کو ئەڤ سالە چوار کەس پێکڤە تێدا خندقینە) و د ڤی دەمی دا، ب رێکا ھاڤێتنا تەناف، چۆپ، یان دارەکێ ھاریکاریا وی بکە و بلا تیمێن نوقموانی یێن بەرگیریا شارستانی کارێ خۆ بکەن.